ateneo ta.

tadom sa paggiromdom, na mayo munang paghorophorop, ang pagsakit, ang kaogmahan, ang paghiling sa harayo, ang paghanap sa kamot na makapot ta ngonyan uya na ngani ang pagmati na inisip lang, dai man minati na maray kundi pighinimbang lang sa maarabot na aldaw, taon o buhay o kung ano talaga ang rason kang mga pagmati na ni, na pighinghing mo sa sadiri mo na totoo, na mayong kaputikan arog kang mga urulay ta kang mga hapon na maharopohop ang duros sa Ateneo, naghihilingan lang sa mata, naghahalat sa saldang na magsulnop sa kung sain man na dai ta nahihiling, nagmamati lang, na may dikit na pangadyi na maghaloy ang mga arog kaning pagmati, sa arog kaning panahon igdi sa batibot, igdi sa mga sementong tukawan na ini, sa irarom kang mga ulpok na kahoy kang niyog igdi, kaya mga halipot na paggiromdomon lang mientras na yaon kita igdi sa ngonyan, na namamati na ang edad, na aram na ang mga boot sabihon kang pagkawara, kang nawara, kang puedeng mawara asin ang habong mawara, mga pangapudan sa sadiring tang pigerokan na sato lang, na magakbay na, na magkapot na ning kamot, na mangkagat na sa kaogmahan ta kataid ta ka na, naghahalat sa banggi, sa diklom para magsulo giraray ning marlboro lights na gold, ta bistado ta man si guard, dai man kita sisitahon, makatabang lang sa pag alaw ning namok, asin makatabang sa pag agi kang oras.
gusto ta ka kutang kuguson sa pagiromdom na ni, 'yan lang ta nainot ka na palan, iniisip ko pa lang ngani.
sabi ninda dai na daa puedeng magkidkid pabalik sa nakaagi na. mala, sala baga sinda.